Litlu búðirnar | Íslenskt handverk

Svava Kristín Egilson hefur um árabil lagt stund á nám í ýmsum skólum sem leggja áherslu á mismunandi listform – og má þar á meðal nefna Myndlistarskólann á Akureyri.  Í verkum hennar er að finna ýmis tákn sem rekja má til íslenskrar náttúru, en litir og form í náttúrunni hafa ávallt hrifið Svövu.  

Aukreitis hefur hún hannað og saumað búninga fyrir leikfélög, hannað bókakápu og myndskreytt barnabók.

”Í myndlistinni vinn ég með vatnsliti , akrýl, dúkristu, og textile og blanda því saman á margvíslegan hátt leyfi sköpunargleðinni að leiða mig áfram án takmarkana,” segir Svava Kristín.  “Haustið 2008 fór ég að vinna með ullina í nytjahluti byrjaði með handstúkur og síðan hatta og aðra fylgihluti. Ullina hef ég svo tekið með mér í myndlistina og nota ég hana mikið í textílverk´og lítil myndverk og bókamerki. ”

Svava Kristín segir að það henti sér vel að vinna í mismunandi efnum.  “Ástæðan er sú að hver þráður og hvert blæbrigði litanna, ásamt mismunandi áferð bjóða upp á óendanlegar uppgötvanir.”

Í mörg undanfarin ár hefur Svava aðallega starfað við myndlist og hönnun og rekið vinnustofu í Brekkugötu 2 í Hafnarfirði frá árinu 2003.